Weihnachtszick-Schrottwichtelzick

Noch 14 Daach, dann es et suh wick, ich freu mich drop wie jeck.
Schrottwichtelovend mem Kejelclub, dat es immer nett.

Du bruchs nix jruß zoh kaufe, op enem Weihnachtsmaat,
nem jet uss Dinger Plunderkess un mach et schön parat.

Et Elle hätt ´ne ne Bierkrug, ech ene super Ahle,
dä jehürt ihrem Paul un dä wöt en jän behale.

De Diskussion die nimp kein Engk, et Elle setz sich durch,
dä Krug dä weiht beim Wichtele Ihre jruße Wurf.

Ria un Pit han ene plastik Kacktus, dä waggelt bei Musik.
Dä han se herrlich enjepack, dat es ihre Hit.

En Haub für Klopapier, jehäckelt udder jestrick
Anne un Jürgen brengen die en 14 Daach dann met.

Jedes Päärche brengk suh singen ahlen Dress dann met
un all sin seh extrem jespannt, wer ihren Prüll dann krett.

Et weiht jewürfelt un bei sechs, doh darf Du Dir jet nemme,
keener weiß wat enjepack en denne Päckche drenne.

Bei fünf, doh darfs Du tuche, bei vier doh jievs Du wigger
em Urhzeijersinn dem Nächste, dann jeiht dat Spellche wigger.

Bei drei un zwei doh tuchs Du noh rechs udder noh links
un pass bloss op, dat keiner vürher spings.

Bei eins darf mer bestemme wer met wem jetz tuche muss,
dat jeiht suh eh paar Ründche un dann es och bal Schluss.

Jeder pack jetz uss et weiht jelaach wie jeck,
dä Bierkruch kräch de Paul, dä Tränche en de Äuelche hätt.

Oktober 2023 – B.Kox