Für Sean

Ich loß Ding Hand nit mieh loß
un wenn et ming Levve koß.
Paß ming Levve lang ob Dich op,
dat es sick dem minge Job.

Ob einmol koms Du en ming Welt,
unbezahlbar met Jeld.
Bes Du jetz dä Mittelpunkt,
wor Du bes jeiht et rund.

Ich loß Ding Hand nit mieh loß
un wenn et ming Levve koß.
Paß ming Levve lang ob Dich op,
dat es sick dem minge Job.

Dat hät ich niemols jeahnt,
ben plötzlich immer verplant.
Opa he un Opa doh,
ich mach dat jähn es doch klor.

Ich loß Ding Hand nit mieh loß
un wenn et ming Levve koß.
Paß ming Levve lang ob Dich op,
dat es sick dem minge Job.

Bes Du wick weg, ich sin Dich nit,
krieje ich doch alles met.
Uns Hätze setzen an d´r jliche Stell,
mer zwei sin ob einer Well.

Ich loß Ding Hand nit mieh loß
un wenn et ming Levve koß.
Paß ming Levve lang ob Dich op,
dat es sick dem minge Job.

Un ben ich einmol ens janz bovve,
sach ich dem Chef vun doh ovve:
Ben ´ne Engel en besonderer Mission,
evver ich jläuv, die wessen dat schon.

Ich loß Ding Hand nit mieh loß
un wenn et ming Levve koß.
Paß ming Levve lang ob Dich op,
dat es sick dem minge Job.

Oktober 2021 – B.Kox

Sonndachmorje om Balkon

Suh vill Lück om Damm, de mechte met ´nem Hungk,
suh laufen ´se Dach für Dach, dat hält seh joh och jung.

Met Inliner un Fahrad suh halde seh sich fit
un och suh manche Jogger mäht jeden Dach doh met.

Ene Mann met Kinderware, läuft jrad et Pädche eraff,
zwei Pänz un noch ´ne Hungk, dat dä dat evver schaff?!

`ne ahle Mann em Rollstohl, de Föss die laufen met,
met de Häng drieht hä die Räder, suh jeiht et Schritt für Schritt.

Frau Schumacher met dä zwei Hüngk, dat kann ich Üch verzelle,
kütt Morjens un och Ovends, doh kannst de Uhr noh stelle.

Dä Käl mem Dalmatiner, dä läuv he jeden Dach,
dä Hungk muss ov Avstand wade, bis dat sing Herrche laach.

Dä ein darf Stöckche holle, dä Andere muss bei Fuß,
Jede Jeck es Anders, jede Hungk kack wo hä muss.

Fraulück dun mechtens schwade, mer hürt se meterwick,
Käls luren noh unge un jrößen miestens nit.

Fraulück met Kinderware sin usser Rand un Band,
seh sprechen laut en et Leere, ´mem Handy en d´r Hand.

Rennradfahrer flitze he vun Ort zu Ort,
kaum häste seh jesinn, sin seh ald widder fott.

Angler kommen uss de Bösch, han de Naach am Rhing jesesse,
de Emmere sin voll, dat weiht secher jlich  eh lecker Esse.

`ne Specht dä klopp eh Loch, en suh ne staatse Baum,
hä klopp och immer wigger, dä Baum, dä merk dat kaum.

De Vülche sin am Zwitchere, et mäht Dir suh en Freud,
ich han noch keine Sundaachmorje, he om Balkon bereut.

Juli 2021 – B.Kox

Ich ben et Danzmarieche en unserer Grupp.
Ich han ene Danzmajor, dat es unsere Jupp.
Ich ben ühr Danzmarie,
mer deiht ov de Rögger wieh.

Immer für üch Jecke laache.
Immer eh Kußschnüssje mache.
Och wenn ich janit jot drop ben
strahl ich für Üch wie ´ne Sunneching.

Ich springe, danze un mach ´ne Spagath
un jeve en Zujabe, wenn Ihr et saht.
Ich dun et vun Hätze, et mäht mer vell Freud,
Danzmarieche zoh sin, han ich noch nie bereut.

Ich wäd jehoffe und jeworfe en bal jedem Saal.
De schönste Johreszigg es für mich de Karneval.
Ming Garde die pass opp un brengk mich gesund zohröck,
Ich ben ihr Marieche, ihr bestes Stöck.

August 2020 – B.Kox

Pap un Mam zoh sin

Pap un Mam zoh sin es ´ne schwere Job,
wer dat jot mäht, vür dem treck ich de Hot.

Vür allem alleinertreckende Papis un Mamis,
sin wahre multitaskingfähige Genies.

Streng sin, ertrecke un konsequent zoh blieve
und dat met Maß, ohne zoh üvverdrive.

Ich wor nie ene Pap, wot direkt Opa janz flöck,
fand en Frau met Kinder an ihrer Sick.

Ich ben de beste Opa der Welt,
evver als Pap, doh wör ich keine Held.

Verstecke spille un Blödsinn mache,
ich hür in einfach vell zoh jän Laache.

Ich kann nit streng sin, dat es ming Problem,
hä es un bliev doch minge Kleen.

Un wenn hä ens eh Trönche verdröck,
deiht mir dat och wieh, dann ligge ich met.

Ich möch in immer nur Jlöcklich sin,
streng sin, ne dat es nit ming Ding.

B.Kox – Mai 2019