1.
De Engel Gabriel hat et Maria verzellt
Du empfängs ene Jung, Hä weeht dä Retter der Welt.
Hä es dä Sonn Gottes, Du muss Dich zoh im bekenne
un Du muss inn dann Jesus nenne.

Refr.
Singt Halleluja un freut Üch wie Jeck
Jesus es jebore un litt doh en dä Kripp.
Singt Halleluja un freut Üch wie Jeck
Jesus es jebore un litt doh en dä Kripp.
Halleluja, hallleluja, halllejuja, halleluja.

2.
Et Marie und ä Jupp trooken noh Bethlehem
evver se fanden keen wirklich doheem.
En enem Stall koom dä Kleen dann zur Welt.
Schoof un Essel han zum Wäärme sich bei in jestellt.

Refr.
Singt Halleluja un freut Üch wie Jeck
Jesus es jebore un litt doh en dä Kripp.
Singt Halleluja un freut Üch wie Jeck
Jesus es jebore un litt doh en dä Kripp.
Halleluja, hallleluja, halllejuja, halleluja.

3.
Hirte kneeten nieder un Könninge uss aller Welt
koomen inn zoh iihre, unsere Held.
Se sangen met der Engelsschaarr,
janz fromm un höösch eh Halleluja.

Refr.
Singt Halleluja un freut Üch wie Jeck
Jesus es jebore un litt doh en dä Kripp.
Singt Halleluja un freut Üch wie Jeck
Jesus es jebore un litt doh en dä Kripp.
Halleluja, hallleluja, halllejuja, halleluja.

B.Kox Juli 2026

Nichtraucher

Ich jläuv , ich wäd jeck man,
ich wullt ene Weckmann
uss minger Bäckerei,
die Zigge sin vorbei,
meinte die Bäckersfrau,
die woß et janz jenau.
Evver dat hat ich noch nit jekannt,
die wäden jetz Nichtraucher jenannt,
denn die han jetz keein Pief
mieh am Liev.
Die Frau däht et mer dann och sare,
en Pief koss fünfunvezich Cent, die dun mer jetz spare.
Dröm han mer en koter Hand
einfach ömbenannt.
Jetz dürf ihr dreimol rode,
Es hä doher billijer jewode?

November 2025 B.Kox

Schöckelpääd

Schökkelpääd

Zum hellije Ovend, dat es nit verkeet,
doh wünsch ich mir eh Schökkelpääd.

Schöckele es jenau wie et Levve,
vür un zohröck, Du muss alles jevve.

Och om Spellplatz op d´r Schökkel doh kütt mer en et Schwitze
un wer sich nit anstrengk, der bliev nur dumm setze. 

Jeiht et zohröck, muss de Dich noh vörre strecke
söns weiht et Dich widder noh hinge trecke. 

Suh jeit dat immer wigger, immer em Fluß
Du muss Dich strecke ohne Verdruß.

Mol swing mer frei wie eh Vöjelche em Sommerwind
dann muss Du klettere wie `ne Bergsteijer öm de Gipfel zoh sin. 

Et jeiht rop un erunder, bei jedem von uns
evver dat hin un her, dat es die Kunst.

Mer krett nix jeschenk, mer muss schon jet dun
dat liert mer op dem Schöckelpääd schun.

Sühste ens en Schöckel beim Spaziere jon,
dann bliev doch ens eh paar Minutte ston.

Setz Dich noch ens drop un schökkel janz doll
erop un erunder, och Ding Levve es dovun voll. 

Dröm wünsch ich mer dat Schöckelpäd, et es nit verkeet,
denn domet hät mer et zoh etz jeleet.

Oktober 2025 - B.Kox

Adventskalender

Adventskalender    (gelesen von Björn Diethelmson)

Adventskalender, wie ihr se kennt, die jov janz fröher nit.
24 Striche an der Tafel, jemolt met wießer Krick. 

Schockolädcher udder Jutsching hinger jeden Dür
ne, dat kom fröher noch nit für.

De Pänz durften jeden Dach ene Strich wegmache,
manch einer maht zwei fott, dat wor für zoh lache.

De Zick bis hellich Ovend jing domet nit schneller vorbei,
de Mam däht et merke un maht widder eine dohbei.

Marzipan und un Sößes jov et nit en Masse,
hück lit et Engk Aujust schon vür de Kasse.

Et woht jefastet, jebet un ob Jesu Jeburt jewaht,
Hück es em Advent nur noch Jewinn anjesaht.

Jeschäfte sin für janix mieh fies,
Engk Sommer, Dominostein palettewies.

Spekulatius un Schoko Nickläus eh Massenprodukt,
ich jev zoh, mir hätt et och ald en de Finger jezuck.

Lot uns all noch ens ob der Kern besinne,
stoppt der Wahnsin, doht vun vörre bejinne.

Hellich Ovend weiht uns all dann klor,
och ohne dä janze Krohm es Jesus dann doh.

Dann kann dat Weihnachtsfest bejinne,
Fruhe Weihnacht, jenesst et met all ührer Sinne.

09/2024 – B.Kox