Doosch es schlemmer als wie Ping

1.
Ezte Bundesliga, de FC es widder dohbei,
doch schon noh zehn Minutte steiht et 0 zoh zwei.
Ein janz Jöhrche han mir doh drop jewad,
he jetz zoh verliere, dat wör doch wirklich schad.

Refr.
Dann drink ich mir eh Kölsch un lur doh janit hin,
denn ich weiß janzjenau Doosch es schlemmer als Ping
joh ich weiß janzjenau Doosch es schlemmer als Ping

2.
De Chef dä mäht Theater, immer schneller immer mieh.
Ich mach ald Üvverstunde un ich weiß ich kann nit mieh.
Et muss och bal ens jot sin han ich mer dann jedach
un han janzflöck enjepack un Fierovend jemaaht.

Refr.
Dann drink ich mir eh Kölsch un lur doh janit hin,
denn ich weiß janzjenau Doosch es schlemmer als Ping
joh ich weiß janzjenau Doosch es schlemmer als Ping

Et es wie et es

1.
Dä Franz, dä wor met singer Frau zoh Besök en Kölle am Rhing.
Uns schöne Stadt un unsere Dom, dat mohten se alles sin.
Hä jing met ihr am Ovend dann, en eh Brauhaus he am Dom,
Köbesse, kannt Hä noch nit un maaht Bekanntschaff schon.
„´ne Schuss un ene Drecksack“ dät Hä dem Köbes winke.
Dä Köbes meint“dat sin ich, evver wat wullt ihr zwei dann drinke?“

Refr.
Et kütt wie et kütt un et es wie et es,
wat willste maache, nur keene Stress.
Wat fott es dat es fott un dann laachste Dich kapott.

Alaaf

De Dom, de Allstadt un de Rhing, he jehüren ich hin.
Mer han eh Woot, dat saren mer un han nur Jodes em Sinn.
Et kütt vun Hätze, uss de Siel un zwar rund öm de Uhr
un wenn et einmol nit suh läuv, dann säht dä Kölsche nur.

Refr.
Alaaf, dat kütt dev uss dem Hätz, dat kennt he jede Panz.
Alaaf, kenne och de Wiever jot, Jeck loss Jeck elans,
Alaaf, dat jit Dir neuen Moot, dat hilf he jedem Fetz,
Alaaf, kütt mer etz üvver de Hungk, kütt mer och üvver de Stetz.

Jode ahle Rhing

Dä ahle Rhing dä kann nit mieh,
krett kaum et Wasser en d´r Hüh.
Met aller Kraft ob jeden Fall,
dräht hä die schwere Scheffe all.

Jode, ahle Vatter Rhing,
leg Dich doch ens einfach hin
mach et Dir ens richtig net,
läch Dich en Ding eije Bett.

All dat Jeff uss d´r Chemie
dun im secher richtig wieh.
All dä Dreck dä met im schwemmp
un im singe Odem nimmp.

Jode, ahle Vatter Rhing,
leg Dich doch ens einfach hin
mach et Dir ens richtig net,
läch Dich en Ding eije Bett.