Sunndaachmorje halve sibbe ich jon mem Hungk,

runder an de Rhing, es für uns alle zwei jesund.

Scheffe fahren erop un eravv,

ich jläuv, die han de janze Naach jeschaff.

Dann kummen ich noh Hus, flöck ´ne Kaffee jemaht,

ov de Terras, en de Liejestohl eh Schlöfje jemaaht.

Vülche zwitschere ihr Leedcher öm de Wette,

als wenn se jet zoh jewinne hätte.

Eh Kätzje kütt vun de Naach noh Huss,

met nem Müsje em Maul, dem Frauche zom Jruß.

De Dorfkirch lück, et es sibbe Uhr,

jetz kütt et janze Dorf langsam op tour.

Eh Baby schreit uss ´nem Finster un hält sich dran,

et hät secher Doosch un waht op d´r Mam.

De Kaplan läuv janz en Schwatz, dä hätt secher Mess,

janz ruhig, hä mäht sich keene Stress.

Jäjen üvver weiht jedusch, mer hürt et Wasser ruche,

mer es et ald suh heiß, ich dät ald jän tuche.

Tellere un Tasse hüren ich singe,

wie schön kann eh Fröhstöcksdeschdecke klinge.

Suh jeith et wohl en manche Köche,

mer kann de Kaffe em janze Dorf rüche.

Ene Jung kütt met Brütcher vun de Bäckerei,

hätt hä och welche für mich dohbei?

Ich hüre Lück schwade un kann se nitt verstonn,

die wäden secher en de Kirch eren jon.

Ene Träcker knattert durch de Stross, määht ´ne höllen Krach,

vun wejen länger schlofe, jetzt es och dä Letzte wach.

Jetz hürt mer ald mehrere Jlocke Lügge,

de Mess fäng jetz an, hätt dat zoh bedügge.

Ich schlof noch eh Ründcher un mach mer keen Surje,

et jitt nix schöneres wie eh Dorf, am Sundaachmorje.

Juli 2015 – B.Kox