Bernds Gedichte

Sean 2 (Mer läuf de Zick dovun)

• Drucken

Details

Zugriffe: 6

Als Baby han ich Dich en minge Ärm jelaht
schun dohmols häs Du mir wor et lang jeiht jesaht.

Vür Selbstbewustsein nur suh jestrotz
un mer dann ob et wieße Hemp jekotz.

Tausendmol Laterne, St.Martin un Juter Mond jesunge
bis Du dann endlich en d´r Schlof jefunge.

Dann lierts Du laufe, et jing janz schnell,
Schritt vür Schritt koms Du vun d´r Stell.

En de Köch häs Du ob alle Pött mem Kochlöffel eröm jeklopp
un anschliessen alles en d´r Spöhlmaschin jestop.

Uss nem Ungersetzer für ene große Kessel
bautes Du met Dinger Autos eh Karussel.

Du fings an zoh danze, nix maahts Du verkiert
vun Michael Jackson jeden Danz enstudiert.

Du häs Ding eijene Wöder kreiert
un ich han dohbei vell jeliert.

Eh Täschedoch heß bei Dir Nasedoch wie wor,
Klopapier heß einfach Popapier, janz klor.

Einfach un logisch, Du bes schun ene tolle Jung,
Du häs nit nur et Hätz, Du häs och de Kopp ob d´r Zung.

Kinderjaade, Grundschol, et jing esuh flöck,
ich lure immer noch jän zohröck.

Jetz steiht vür mir ene Labes, bal jrößer als ich,
ich kann nur noch staune un fass es nicht.

Ich wöd am levvste immer jet met Dir dun,
ich han dat Jeföhl, mer läuf de Zick dovun.

Ävver mer ston nit mieh janz bovve ob Dinger List,
weil Du Dich immer öfter met Dinger Früngde triffs.

Der Avstand weiht jrößer, suh es nunmohl et Levve,
Ich jenesse jede Sekund un wöt alles dofür jevve. 

Januar 2025 – B.Kox

12 Pänz

• Drucken

Bewertung: 5 / 5

Details

Zugriffe: 5532

12 Pänz

Als ich ene kleene Panz jewese ben,
ich kann et noch esuh vür mer sin.
Ich hatt elf Jeschwister, doh wor jet loss,
hätt Mam un Pap vell Nerve jekoss.

Un jing et Ovens en et Bett,
stallten mer all uns Schoh en d´r Flur, korrek.
De Mam dät de Schoh dann zälle un woren se all doh
jing se och schlofe, dann wor alles klor.

Eines Ovens kom se üvverhaup nit klar,
denn em Flur doh stunten nur 11 Paar.
De Pap wot jerove, hä kunnt jot zälle,
evver zehn, elf, ein Paar dät fehle.

Frau Hanrath vun nevven an wot rusjeschellt
evver och die hätt nur elf Paar jezällt.
De janze Nohborschaff wor jetz enjetroffe,
keiner kunt mieh wirklich schlofe.

Jetz wot och noch de Polizei jerove,
noher wor noch ei Kind fottjelaufe?
All däten die elf Paar zälle, bis zoh letz,
om Joddes Wille wat machen mer jetz.

De Pastur dät bedde un uns all sähne
hä zahlt och nur bis elf un dat unger Träne.
Et janze Dorf hat sich jetz he versammelt
och dä Scholllehrer hätt nüng, zehn, elf jestammelt.

Minge älste Broder kom uss singem Zemmer en de Flur
wat es dann he loss, frochten hä nur?
Mam un Pap, krett keene Schreck,
dä Eugen litt met d´r Schoh em Bett.

Tradition
Bearbeitet im Mai 2022 B.Kox

De deutsche Adler schlöf

• Drucken

Details

Zugriffe: 357

De deutsche Adler schlöf

En de sechzijer Johre, suh weiht et verzällt,
fuhren deutsche Ingenieure en de janze Welt.
All däten se staunend ob uns lure,
„Made in Germany“ et es zoh bedure.
Hück läuv suh manches he verkeiht,
mer hät dat Jeföhl, dat janix mieh jeiht.
Nix weiht fädich, nix jeiht vüran,
wat es bloß loss en unserem Land?

De Welt trick vorbei un häng uns av.
Beim Adler hängk de Kopp erav.
Mer hürt deutlich wie alles röv,
„maht flöck, dä deutsche Adler schlöf“

Flughafen, Oper, Bahnhof, nix weiht jewupp.
He hätt sick Johre nix mieh jeflupp.
De Koste explodiere, doren han mer Bejabung,
de Steuerzahler, der mäht dat schun.
Vürschrifte blockiere jedes Jewerk,
en Jesetze mache, doh sin mer stärk.

De Welt trick vorbei un häng uns av.
Beim Adler hängk de Kopp erav.
Mer hürt deutlich wie alles röv,
„maht flöck, dä deutsche Adler schlöf“

Doh wäden Sache durchjedröck,
mer meint, die sin total verröck.
Dä Mautskandal völlig be Scheuer t
243 Millionen, bezahlt vun unserer Steuer.
Keiner steiht jetz dofür jrad,
jeder hät en Entschuldijung parat.
Die, die bestrov wäde möte,
han eh neu Pössje un sin noch am flöte.

De Welt trick vorbei un häng uns av.
Beim Adler hängk de Kopp erav.
Mer hürt deutlich wie alles röv,
„maht flöck, dä deutsche Adler schlöf“

Investiert ens mieh en unser Land.
Uns Scholle sin uss, et es en Schand.
Vür alles es he eh Verfalldatum jot,
nur ob Scholltoilette es keins drop.
Se sin ov kapott un stinke für Dreck,
uns ärm Pänz wäden jedesmol dut vür Schreck.

De Welt trick vorbei un häng uns av.
Beim Adler hängk de Kopp erav.
Mer hürt deutlich wie alles röv,
„maht flöck, dä deutsche Adler schlöf“

De Autoindustrie, die es am penne,
verliert en d´r E-Mobilität et Renne.
De Arbeiter soll jetz dofür blode
un de Vürständ, die kassiere Millione.
Kaum einer es mieh ehrlich dohbei,
et jeiht inne all am Arsch vorbei. 

De Welt trick vorbei un häng uns av.
Beim Adler hängk de Kopp erav.
Mer hürt deutlich wie alles röv,
„maht flöck, dä deutsche Adler schlöf“

Steig weltweit de Berrel Öl Preis, sin die op Zack.
An d´r Tankstell steig de Preis em Sekundentakt.
Jeiht de Preis dann widder erav,
dann han se et noch nie jeschaff,
doh stell ich mer suh ov die Froch:
„woröm durt en Preissenkung en janze Woch?"

De Welt trick vorbei un häng uns av.
Beim Adler hängk de Kopp erav.
Mer hürt deutlich wie alles röv,
„maht flöck, dä deutsche Adler schlöf“

Bestell dene Rejierende vun mer schön Jröß,
ihr stoht üch selver ob de Fööss.
Statt jejen enander üvver üch selver zoh schenge,
dät ihr besser unser Land widder noh vörre brenge.
Schneller richtich entscheide wör prima,
für de Infrastruktür und für et Klima.
Bei Entscheidunge sachlich un fachlich richtig ziele
un nit noh Wählerstemme und Beliebtheit schiele.
Sich nit immer noh de Stimmung beje
sondern ens deutlich Rückrat zeije.

De Welt trick vorbei un häng uns av.
Beim Adler hängk de Kopp erav.
Mer hürt deutlich wie alles röv,
„maht flöck, dä deutsche Adler schlöf“

Oktober 2024 B.Kox

Ene Engel Für zoh Laache

• Drucken

Bewertung: 5 / 5

Details

Zugriffe: 2835

Ich schenke Dir ´ne Engel für zoh laache,
der mäht für Dich, de aller lustichste Sache.
De Herrjott weiht et mir wohl nit verdenke,
wenn he süht dat ich en an Dich verschenke.

Hä sull Dich für immer zum Laache brenge,
och wenn alle andere met Dir schenge.
Och wenn Du hüls, weil et Dir nit suh jot jeiht,
dann weiß Du sin, dat Dir dä Engel jot deiht.

Hä breng Dir Jlöck, ob allen Dinger Wäje,
Hä hätt joh och secher Joddes Säje.
Met joldene Engelsflüjelcher wie eh Jedech
un ener knallruden Papnas em Jesech.

Hä laach Dir direk en et Hätzcher eren,
mäht Leech dohin, wor kein Kätzche mieh sin.
Brengk et Laache un dä Fruhsin Dir zohröck,
wo hä es, es vum Himmel eh Stöck.

Hä weiht nit nur et Hallelujah singe,
och eh Allaaf weiht vun im herrlich klinge.
Hä kennt wohl jedes Kircheleed
evver och bei d´r Bläck Fööss sing hä jän met.

Ich schenke Dir ´ne Engel für zoh laache,
denn ich sin Dich nun öns suh jän herrlich laache.

Januar 2022 – B.Kox

De Wedder Äpp

• Drucken

Details

Zugriffe: 466

De Wedder Äpp

Schön Wedder en Sicht
säht de Wetterbericht.
Vell Sonn wie nett
säht de Wedder Äpp.
Ming Koleje stöhne an einem Stöck,
de Wedder Äpps spellen total veröck.
Morje brennt de Sonn janz fett,
säht minger Dochter ihr Wedder Äpp.
Ming Frau die es doh och janz jeck,
lurt jede Stund ob de Wedder Äpp.
Morje weiht et dröckend un schwül,
mieh als dressig Jrad han ich em Jeföhl.
Och die Äpp vum Sohnemann,
jit im 30 Jrad vür Morje an.
Op bei der Hitz och irjendjet klapp,
bei dressig Grad, doh mache ich schlapp.
Dachs drop, am Finster ich ben mich am Jrähme,
et es ald de janzen Dach am räne.

August 2024 – B.Kox

Für Sean

• Drucken

Details

Zugriffe: 2918

Ich loß Ding Hand nit mieh loß
un wenn et ming Levve koß.
Paß ming Levve lang ob Dich op,
dat es sick dem minge Job.

Ob einmol koms Du en ming Welt,
unbezahlbar met Jeld.
Bes Du jetz dä Mittelpunkt,
wor Du bes jeiht et rund.

Ich loß Ding Hand nit mieh loß
un wenn et ming Levve koß.
Paß ming Levve lang ob Dich op,
dat es sick dem minge Job.

Dat hät ich niemols jeahnt,
ben plötzlich immer verplant.
Opa he un Opa doh,
ich mach dat jähn es doch klor.

Ich loß Ding Hand nit mieh loß
un wenn et ming Levve koß.
Paß ming Levve lang ob Dich op,
dat es sick dem minge Job.

Bes Du wick weg, ich sin Dich nit,
krieje ich doch alles met.
Uns Hätze setzen an d´r jliche Stell,
mer zwei sin ob einer Well.

Ich loß Ding Hand nit mieh loß
un wenn et ming Levve koß.
Paß ming Levve lang ob Dich op,
dat es sick dem minge Job.

Un ben ich einmol ens janz bovve,
sach ich dem Chef vun doh ovve:
Ben ´ne Engel en besonderer Mission,
evver ich jläuv, die wessen dat schon.

Ich loß Ding Hand nit mieh loß
un wenn et ming Levve koß.
Paß ming Levve lang ob Dich op,
dat es sick dem minge Job.

Oktober 2021 – B.Kox

Lampeköpp

• Drucken

Details

Zugriffe: 1702

Lampeköpp

Jetz en d´r dunklen Johreszick,
doh sühste se widder, de Lampeköpp.
Du denks, die jon unger Tare, die sin jlich fott,
se han joh schliesslich en Lamp am Kopp.

Doch et sin Walker, Jogger un Lück met ´nem Hungk,
die han für die Lamp joh all ene Jrund.
De Wäch es dunkle, doh weihst de beklopp,
dröm han die jetz all en Lamp am Kopp.

Deihs du dat vun wiggem betrachte,
muss mer maches mol bal laache.
Em Dunkele waggele Lechter her un hin,
dä Minsch doh zoh kress Du etz später zoh sin.

Du meins doh schwirre decke Jlühwürmche üvver de Wääch,
un küss du nöher dann stauns du nit schlech.
Et weiht immer mieh, doh weiste verröck,
manch einer es wie ene Chressbaum bestöck.

Bunte Lampe blinke vun Kopp bis Fott,
kein Stell kütt wohl  dohbei zoh koot.
Och om Fahrradwääch am Stroßerand ,
weiß Du vun wiggem schun erkannt.

Och dä Hungk weiht opjehellt
dä blink ald bevür hä et etzte mol bellt.
Un mäht hä Pippi bei Gassijon,
dann muss hä unger Flutlicht ston.

Jetz en d´r dunklen Johreszick,
doh süste se widder de Lampeköpp.
Du denks, die jon unter Tare, die sin jlich fott,
se han joh schliesslich en Lamp am Kopp.

Dezember 2023 – B.Kox

Sonndachmorje om Balkon

• Drucken

Details

Zugriffe: 1714

Suh vill Lück om Damm, de mechte met ´nem Hungk,
suh laufen ´se Dach für Dach, dat hält seh joh och jung.

Met Inliner un Fahrad suh halde seh sich fit
un och suh manche Jogger mäht jeden Dach doh met.

Ene Mann met Kinderware, läuft jrad et Pädche eraff,
zwei Pänz un noch ´ne Hungk, dat dä dat evver schaff?!

`ne ahle Mann em Rollstohl, de Föss die laufen met,
met de Häng drieht hä die Räder, suh jeiht et Schritt für Schritt.

Frau Schumacher met dä zwei Hüngk, dat kann ich Üch verzelle,
kütt Morjens un och Ovends, doh kannst de Uhr noh stelle.

Dä Käl mem Dalmatiner, dä läuv he jeden Dach,
dä Hungk muss ov Avstand wade, bis dat sing Herrche laach.

Dä ein darf Stöckche holle, dä Andere muss bei Fuß,
Jede Jeck es Anders, jede Hungk kack wo hä muss.

Fraulück dun mechtens schwade, mer hürt se meterwick,
Käls luren noh unge un jrößen miestens nit.

Fraulück met Kinderware sin usser Rand un Band,
seh sprechen laut en et Leere, ´mem Handy en d´r Hand.

Rennradfahrer flitze he vun Ort zu Ort,
kaum häste seh jesinn, sin seh ald widder fott.

Angler kommen uss de Bösch, han de Naach am Rhing jesesse,
de Emmere sin voll, dat weiht secher jlich  eh lecker Esse.

`ne Specht dä klopp eh Loch, en suh ne staatse Baum,
hä klopp och immer wigger, dä Baum, dä merk dat kaum.

De Vülche sin am Zwitchere, et mäht Dir suh en Freud,
ich han noch keine Sundaachmorje, he om Balkon bereut.

Juli 2021 – B.Kox