Suh vill Lück om Damm, de mechte met ´nem Hungk,
suh laufen ´se Dach für Dach, dat hält seh joh och jung.

Met Inliner un Fahrad suh halde seh sich fit
un och suh manche Jogger mäht jeden Dach doh met.

Ene Mann met Kinderware, läuft jrad et Pädche eraff,
zwei Pänz un noch ´ne Hungk, dat dä dat evver schaff?!

`ne ahle Mann em Rollstohl, de Föss die laufen met,
met de Häng drieht hä die Räder, suh jeiht et Schritt für Schritt.

Frau Schumacher met dä zwei Hüngk, dat kann ich Üch verzelle,
kütt Morjens un och Ovends, doh kannst de Uhr noh stelle.

Dä Käl mem Dalmatiner, dä läuv he jeden Dach,
dä Hungk muss ov Avstand wade, bis dat sing Herrche laach.

Dä ein darf Stöckche holle, dä Andere muss bei Fuß,
Jede Jeck es Anders, jede Hungk kack wo hä muss.

Fraulück dun mechtens schwade, mer hürt se meterwick,
Käls luren noh unge un jrößen miestens nit.

Fraulück met Kinderware sin usser Rand un Band,
seh sprechen laut en et Leere, ´mem Handy en d´r Hand.

Rennradfahrer flitze he vun Ort zu Ort,
kaum häste seh jesinn, sin seh ald widder fott.

Angler kommen uss de Bösch, han de Naach am Rhing jesesse,
de Emmere sin voll, dat weiht secher jlich  eh lecker Esse.

`ne Specht dä klopp eh Loch, en suh ne staatse Baum,
hä klopp och immer wigger, dä Baum, dä merk dat kaum.

De Vülche sin am Zwitchere, et mäht Dir suh en Freud,
ich han noch keine Sundaachmorje, he om Balkon bereut.

Juli 2021 – B.Kox