Die doh Bovve

An die doh Bovve, die Stradivaris der Arschgeigen

Keiner will sterve, dat es doch klohr!
Wozu sin denn dann Kreje doh?
He, Präsident du bes doch einer vunn denne!
Kanns Du mer ens eine Jrund dofür nenne?

Usjebomb un afjebrannt,
nur Schutt un Dreck am Stroßerand.
Ming schöne Stadt wie sochs Du uss?
Wo woren die Strosse, wo stunt dat Huus?

Allein dä Jedanke doh dran, dä mäht mich kapott.
Krechtüchtig sin, bliev mer blos fott.
Hürt ob immer mieh Obrüste zoh beschleße,
lever hundert Stund verhandele , als ein Minut schesse.

Ach Milliarden Minsche wolle doch Fredde!
Nur en Handvoll will Krech, sit ihr domet zoh Fredde?
Met uns mäht he keiner de Mollie mieh,
mer wulle en Fredde levve, kapiert Ihr dat nie?

All Minsche der Welt sprechen en ihrer Sproch,
se stellen sich all de jliche Froch.
Jit et eh Levve ohne Hass un Kreje,
nur met Ihrlichkeit, ohne zoh leje.

Freiheit un Brüderlichkeit, dat es dat wat mer well,
passt bloss op un setzt dat nitt ob et Spell.
En Fredde levve, en jedem Land,
jede Krech es für uns Minschheit en Schand.

Wenn Ihr evver meint, ihr hat anderes em Kopp,
dat krett ihr ene Trett en de Fott, maht üch fott.
Mer passen ob un wäden et Üch jevve,
denn mer klääve, wie d´r Düvel am Lääve.

B.Kox – Mai 2025