Ich weiß et noch wie Jestern, dat will ich Dir Hück sare.

Em wieße Kleid han ich Dich, üvver de Schwell jedrare.

En uns´rer etzten Wonnung, zwei Zemmer, Diele Bad,

an unserem Jjlöck un Liebe, doh woten mer nit satt.

 

Et wot och ald ens laut, et jov suh manchen Krach,

dann schlev ich op d´r Couch, manche lange Naach.

Keener wullt jet sare, jeder helt de Schnüss,

doch zum jode Schluss, doh han mer uns jebütz.

 

Refr.

Du bes immer noch ming Liebelein, ich ben mächtig stolz.

Das muss wahre Liebe sein, Du bes uss jodem Holz.

Immer widder wöt, ich üvver de Schwell Dich drare.

Nur en welche Richtung, dat wät ich Dir nit sare.

Dann han mer unser Hus jebaut, dat hätt vell Kraft jekoss.

Wenn et noh Dir jejange wör, hätten mer jetz eh Schloss.

Manches Tränche rollte, Dir üvver et Jeseech,

wenn et nit suh leev, wie et Dir wor rech.

 

Dann han mer doh jesesse un widder üvverlaat,

ich weiß et noch wie Jestern, ich han zoh Dir jesaht:

„Drei Kinderzemmer, sach ens muss dat denn wirklich sin?“

Du sahs:“Ne zwei, en dat drette kütt ming Mutter ren.“

 

Refr.

Du bes immer noch ming Liebelein, ich ben mächtig stolz.

Das muss wahre Liebe sein, Du bes uss jodem Holz.

Immer widder wöt ich, üvver de Schwell Dich drare.

Nur en welche Richtung, dat wät ich Dir nit sare.

 

Zwei Pänz han mer jekräje, eh Mädcher un ´ne Jung.

Se brahten en uns Levve, noch ens mächtich Schwung.

Silverhuhzick fierten mer, schun vür eh paar Johr,

wie schnell de Zick verjeiht, dat es doch bal nit wor.

 

Un hatten mer ens richtich Strick, lehten et mächtich kraache,

met minger frechen Schnüss, braht ich Dich doch zum Laache.

Dann denk ich an die Schwell, vür unserer Enjangsdür,

lur Dir deev en d´r Aure un saren dann zoh Dir.

 

Refr.

Du bes immer noch ming Liebelein, ich ben mächtig stolz.

Das muss wahre Liebe sein, Du bes uss jodem Holz.

Immer widder wöt ich, üvver de Schwell Dich drare.

Nur en welche Richtung, dat wät ich Dir nit sare.

Juli 2015 – B.Kox